8 maj, 2018 – Presidenti i FFK-së, Fadil Vokrri, po qëndron për vizitë në Kroaci si mysafir i Hajdukut të Splitit. Me këtë rast presidenti Vokrri, sonte, ka takuar futbollistin tonë që është pjesë e këtij klubi, Ardian Ismajli dhe menaxherin Enver Raça. Gjatë këtij takimi futbollisti Ardian Ismajli ka konfirmuar se edhe në ardhmen do t’i mbrojë ngjyrat e Kosovës. Në këtë mënyrë janë hequr të gjitha dilemat që ishin ngritur kohë më parë nga mediat dhe janë demantuar zërat dhe shkrimet se Ismajli mund t’i bashkohet  Shqipërisë. Ardian Ismajli ka qenë lider i Kombëtares së Kosovës U21 në ndeshjet për kualifikimet e Evropianit 2019, ku ka pasur paraqitje  të shkëlqyeshme. Ai ka treguar formë të mirë edhe në skuadrën kroate, derisa pa dyshim është një potencial i madh i Kombëtares së Kosovës.