16 nëntor, 2018 – Në një ambient të ngrohët e miqësor, Federata e Futbollit e Maltës, përkatësisht presidenti saj Norman Darmanin Demajo me bashkëpunëtorë shtroi darkë për krerët e FFK-së, presidentin Agim Ademi, nënkryetarin Bakir Burrri, anëtarët e KE Iljaz Mjaku e Luan Vokshi, sekretarin e përgjithshëm Eroll Salihu dhe menaxherin e ekipit Bajram Shala. Të dy presidentët bashkëbiseduan për zhvillimin e futbollit në të dyja vendet, për thellimin e bashkëpunimit të mëtejm, duke vlerësuar bashkëpunimin e deritashëm si shumë të suksesshëm, në këmbimin e përvojave, në dërgimin e gjyqtarëve të Kosovës në Maltë për të ndarë drejtësinë në Ligën e Maltës dhe anasjelltas dhe kjo do të vazhdojë edhe në të ardhmen.